söttme wük mal im memphis gsi si?
mängi mensche schaffed, demit anderi zur arbet chömed.
«i dere stadt wo nume de strich läbt», mittwuch morge, 7h30 langstrass. de strich läbt fürs business. das macht er immer. das macht ganz züri. fürs business läbä. Fürs ganz grosse. Ich mein nid ganz das, wo du meinsch. Nid ganz. Au aber nid numme. Ich mein das riese gottverdammte business, dass gopferdami verantwortlich isch für all das da. Nid numme schlecht nei, nei, aber au, vor allem und immer meh und verstöhhnd ihr s denn nid ? verstahschs du wük nid? Mach witer so und s kollabiert irgendwenn das business. mach witer so und du kollabiersch irgendwenn. Hesch dir schomal überleit wo das Prostitution wük afangt?
gsehsch mi numme oder nimmsch mi wahr?
schnelli schritt, starri blick. de vor de arbet groove hört au a de langstrass nid uf.
sit wenn schlafed i züri mensche uf de strasse, wie chan ich helfe, was chani mache, wieso hilfi nid.
was denksch denki über di? denksch du was denki über di?
me weiss nienets so gnau wie a de langstrass wo s lang gaht.
wenn mir eus so drü sekunde alächlet, sind mir denn nume bekannti oder scho besti fründ:inne? idruck nach idruck. de druck zerdruckt mi.
hey langstrass bitte versprichmer, verfallsch nid allzu gli em charme vo de gentrifizierig! langsam langets, findsch nid au!?
blaui auge. blickkontakt. würi di nomal gse, wüssti nid wer d wärsch.
wenn mir eus so drü sekunde alächlet, sind mir denn nume bekannti oder scho besti fründ:inne?
laufemer zemme barfuess über d langstrass? bitte chum scho. ich ha mal ghört wemmer teer mit de füess berührt wird's plötzli gras.
sunnemensche reglet de verchehr.
ich mag s statement vo dim velo
augepaar um augepaar, wür am liebste alli treffe, wür am liebste alles wüsse.
